Юмны чанар муудаад л байгаа энэ үед ганц чанар нь сайжирч байгаа юм бол энэ ханиад л байна даа. Одоо энэ баллаж байгаа ханиад бол жишээ нь их глобалчлагдсан ханиад байх юм. Тахиа, гахай, хүний гэсэн хосолсон шинжтэй. Бас л овоо муу гар даа. Хэ хэ. Энэ нөхөр ханиад гэдгээсээ илүү нийгмийн асуудал болж мань мэтийн амьдралд хэрхэн гай тарьж буй тухай хэсэгхэн хугацаанд өгүүлсүгэй.

Ерөнхийдөө бол би Ламбаа сайд болон ЭМЯ-ны барьж байсан эхний тактикийг ихээхэн дэмжиж байсан юм. Тэр нь өнөө "битгий та бүхэн айхтар эмээж сандраарай, хувийн ариун цэвэрээ сайн сахиад биеийн дархлаагаа өндөр байлгах тал дээрээ анхаараарай" гэсэн утгатай хандлага. Тэгэхдээ зүгээр яриад байсан нь мөн сайдын ярихын хажуугаар инээсэн нь л онцгүй байсан байх. Хэ хэ. Уг нь бол ариун цэвэрийг сайжруулна гэдэг нь юу юм, хэрхэн биеийн дархлаагаа гэр зуураа сайжруулах юм. Тэр сайжруулдаг юмнууд нь хаагуур байгаа юм. Хангалтыг нь хэрхэн сайжруулсын, ямар тун жороор, ямархуу давтамжтай хүртээд байвал аюулгүй юм гэсэн зөвлөгөөнүүд хамт явах байсан байх. Зиа зиа сайдын ажилд хошуу дүрээд ч яахав.

Харин сайд бол бидний ажилд аймаар хошуу дүрж байнаа. Би бол энэ ханиадны вирусыг агаар, дусал гэдэг замаар халддаг гэж ойлгоод байгаа юм. Түүнээс энэ агаараар дамжина, энүүгээр бол дамжихгүй ч юмуу? Нэг бол эдэн цагаас өмнө халдварлуулахгүй ээ, харин тэдэн цагаас хойш бол найдвартай халдварлуулна шүү, ийм насныхныг өршөөнө ийм насныхныг өршөөхгүй гэсэн сонголт энээ тэрээ байхгүй гэж боджуугаам. Гэтэл манай яамны нөхөд болохоор ханиадны вирүстэй дугуй ширээний ярилцлага хийсиймуу хайшаа юм нэг тийм харьцангуй шийдвэрүүд гаргаад ханиаднаас айж ядаж байхад хажуугаар нь гахайн хороо шиг юм үүсгээд лай болоод байх юм даа. 

Жишээлбэл энэ ханиадны вирус орчин үеийн вирус учраас ПС тоглоом болон Биллиарданд их дуртай нөхөр гэнэ. Тиймээс энэ чиглэлийн бизнес эрхэлдэг хүмүүс бүгд ханиадтай хамтарч ажилласан хэргээр бизнесээ хаах торгууль хүлээчихжуугаа юм. Харин тухайн вирус гуай нь архи, тамхинд дургүй, чанга хэмнэлтэй хөгжимнөөс бүүр холуур явдаг болохоор нь хөлсөө цутган бүжиглэж, бага зайнд олуулаа бужигнаж, агаарын солилцоо нь харьцангуй муу байдаг бааар цэнгээний газар, диско клубүүдийг хаахгүй байх жишээтэй.

Бас энэ вирус болбоос шөнийн амьдралтай нэг үгээр бүл хүн чоно, үнсгэлжин мэт цагаар солигддог аюултай этгээд юм. Яагаад гэвэл 21 цагаас өмнө хүнд ямар ч гэмгүй энгийн номхон царайлж байж байгаад 21 цаг өнгөрмөгц л шидийн муухай зан нь хөдлөөд хүмүүсийг хайр найргүй өвчлүүлдэг бузартай новш доо хөөрхий. Тиймээс ч манай мэргэн, түргэн яам маань биднийхээ төлөө бүх үйлчилгээг 21 цаг хүртэл ажиллуулж байгаа юм. Хулгайгаар ч юумуу нэг бол ажлын байр, айл гэрт бөөгнөрч байгаад ханиад хүрвэл хохь нь шүү дээ. Яг 21 цагаас хойш туссан гэдгийг чинь яам мэднэ шүү дээ. Хэ хэ.

Бас энэхүү вирус нь бага насны хүүхдүүдэд аймаар дургүй, муухай ааштай, хажиг өвгөн шиг лүд юм гэнэ. Харин томчуудыг бол толгойг нь илээд тоохгүй явуулчихна. (Ингээд бодохоор томчуудын ордог газруудад цагийн хязгаарын хэрэггүй ч шиг санагдана) Гэтэл бас тиймгүй шиг харагдаад байгаа юм. Манайд гахайн ханиадтай холбоотой нас барсан хүмүүс нь бараг 100% насанд хүрэгчид байх. Нөгөө муу золигийн вирус чинь манай яамныхантай насанд хүрэгчдийг яах ч үгүй гэж хүүхдүүдийг харантийлуулангуутаа толгой эргэх, сонгох гэсэн юмгүй дан насанд хүрэгчидтэй тулж ажиллаад байгаа юм бусуу. Яамныхан минээ сөрөг тагнуулын ажиллагаа энээ тэрээ хийсэн бидээ энэ чинь. Өнөө муу гэрээсээ гарах газаргүй хоригдож байгаа хүүхдүүддээ томчууд бид үнэ төлбөргүйгээр гахайн томуу зөөж үйлчилэхгүй ч гэх газаргүй шиг санагдана.

Хамгийн гол нь зөвхөн хүүхдүүдийг л хорионд оруулчихсан болохоор өнөөдүүлийг чинь харж хандах, асарч тэтгэх, хайрлан энхрийлэх, сурган хүмүүжүүлэх шаардлага эцэг эхчүүд бидэнд зайлшгүй тулгараад байдаг. Гэтэл бидний ажилд хөл хорио тогтоогоогүй. Таслаад явбал гэр бүлээрээ өлсөглөн болоод гахайн томуунаас өөр ямар нэг аргаар үхчих гээд байдаг. Энийг одоо яах вэ сайдаа. Өнөөдөр л гэхэд би үдээс өмнөх ажлаа, манай эхнэр үдээс хойших ажлаа таслаж хүүхдүүдээ харж байна. Цаашдаа ийм байдлаар удвал бид хоёр хоёулаа л ажилгүй болох байх. Нэг бол хоёр хүүхдээ гэрт нь хаяад орой очиход шатаад, унаад, өлсөөд, хулгайлагдаад, залилагдаад, харангадаад, зодолдоод, гэрээ нураагаад хаячихаагүй байгаасай хэмээн өдөржин стресдэж ажиллах арга байна. Ямар олон эцэг, эх өнөө харантийтай нөхрийг дагуулцөөн ажил дээрээ явж байгаа болоо. 

Сайд минээ. Ийм мэтийн элий балай шийдвэрээ сайн болгоож, тунгааж байж гаргаж байгаач ээ. Тэгэхгүй бол энгийн ард бид чинь зовлонг нь үүрэх гэж хэцүүдэх юмаа. Танай хүүхэд том болчихсон байх л даа. Жижиг ч байлаа гэсэн сайдын хүүхдийг харах хүн захаас аваад олддог байлгүй. Бид бол цэцэрлэг, сургууль гэдэг зүйлсэд л хүүхдүүдээ байлгаж гэмээнэ ажилаа хийдэг юм шүү дээ. Сургуулийн хүүхдийг ганцааранг нь үлдээгээд явж болж байсан юм. Цэцэрлэгийн хүүхдээ бол бага ангийн ахад нь даатган орхиж төвдөхгүй байна шүү.

Вирусны дотоод мөн чанарыг ямар нэг аргаар ойлгож, түүнтэй холбоотой мэргэн түргэн шийдвэр гаргаж байдаг эрхэм сайд та миний энэхүү бичвэрийг уншаад эрхбиш нэгийг ойлгоно хэмээн найдаж байна шүү. Вирусэнд бус бидэнд ээлтэй шийдвэр гаргаж тус болоорой. Гялайлаа.

Түүний эрх ашиг биш бидний эрх ашиг хөндөгдөөд байх юм даа.